『 时光如愿 』希望返港演壓力下完成音樂劇 陳明憙喜獲前輩支持

陳明憙（Jocelyn）早前為舞台音樂劇《愛在星光里》留在上海備戰，一連四場嘅音樂劇終於在上周公演完畢。Jocelyn話呢個劇有陳少琪任藝術總監、編劇、作詞，有金培達做音樂總監、作曲，仲有奚仲文做美術顧問，佢自己有份參與覺得好榮幸，但都有一定壓力。
不過Jocelyn話好開心今次有好多前輩撐佢，當中包括梁詠琪（Gigi）、陳曉東、許茹芸同唱片監製葉澍暉等等，Gigi更加被故事感動到流眼淚。Gigi就話：「同少琪識咗好多年，睇住佢兩年前構思呢個音樂劇，見到佢一步一步行到今日正式公演，真係好感動，Jocelyn就演得好好，睇得出佢落咗唔少功夫。」
完成咗四場演出，Jocelyn認為自己仲有好多不足，佢話：「我對自己會有要求，希望一場比一場演得更加好、更加放，最開心係參與今次音樂劇，過程學咗好多嘢，對我日後嘅音樂事業會有一定幫助，再加上戲裡面我飾演嘅角色馬琳，對愛情好盲目，某程度同我對愛情的態度好相似，所以演出時份外投入。」明年初《愛在星光里》會喺大陸作巡迴演出，Jocelyn話希望呢個音樂劇可以喺香港演出。