八月七日，壹天俱乐部（第三家分店）即将勒亚新广场正式营业。勒短视频里向，看到了勿大做广告个毛猛达勒勒立台做宣传。当然咾，为亲友个生意，偶然破次例，也勒情理之中。
上海滑稽戏其实是一个老有生命力个地方剧种，可惜现在勒海走下坡路了。

五十年代，姚周两位大师个独脚戏堪称一绝。两位大师个语言功力炉火纯青，常庄是阿弟周柏春勒一只一只个坑，兄长姚慕双则是小心翼翼个应对。勒学英文搿只段子里，拿黄鳝翻译成揑勿牢滑脱，堪称一绝。促掐个阿弟硬劲拿有一定功底个姚老师逼成功蹩脚个英文翻译。一只只包袱引得听众捧牢仔肚皮穷笑八笑，而伊拉却是一面孔个严肃，冷面滑稽。勿像现在有眼功力比较浅个演员用劲力气穷叫八叫，拼仔命个想让观众去笑，而观众呢，却是随便哪能也笑勿出来。

到六十年代，姚周率领双字辈徒弟为观众奉献了一台又一台个精彩大戏，满园春色，满意勿满意，七十二家房客咾啥，侪是精品。同年代个杨华生兄妹个糊涂爷娘也是上品。楊华生个说唱小菜场也蛮有味道个。还有严顺开个阿混新传，侪拨观众带来了难忘个记忆。黄永生个上海说唱，秉承了师傳袁一灵个真传，金铃塔里个绕口令贯口，勿但吐字清晰，而且语速达到了前无古人，后无来者个惊人水平。

当年创作演出了像古彩戏法等一大批让人津津乐道个上海说唱。还精心培养接班人连彬尧，可惜现在勿晓得到阿里搭去了。
小滑稽周立波沉寂了一段辰光，后来勒关栋天等人个大力护植下头，用海派清口拿独脚戏推向了又一个高峰，红极一时。经典台词流传邪气广个。至于人品呢，又是另外桩事体了。勿得勿讲，唱滑稽确实是另有一功个。
滑稽传到小小滑稽一代，却是一代勿如一代了，开始辰光还算努力，随牢市场经济个诱惑，搿批人里勿少对本行已经勿感兴趣勿务正业了，借仔媒体个平台，穷凶极恶个捞钞票。做吃个节目，拿自家吃得滚滚圆，做代言个，勿遗余力个推销老人鞋子，卖假表，假个虫草。只好讲伊拉自家老滑稽个，让人却是邪气失望。

现在，毛猛达沈荣海一对老搭档勿忘初心，还苦苦个坚守勒石库门里，为滑稽事业而努力。精神可佳！
2019年，勒中国大戏院里，看过伊拉演出“石库门里个笑声”，老精彩个。当时主持人是张民权。
联想到滑稽戏个今昔。可能滑稽戏真个要像大师所讲个，揑勿牢要滑脱个？！

———————要不要我录音频，不过我声音不好听

王汝刚这种上海话是听起来最舒服的，市区话带点上海本地口音。有一件事搞不懂，说苏北人在骂他，说他隐瞒了苏北祖籍，自称祖籍宁波

燕燕做媒我唱过，金陵塔唱过一小段