Naj gou ndaem youh beuq ,
Yawj mbouj seuq geijlai ;
Sim siengj guhdoih ai ,
Hix raen sai mwngz nuengx .

Gou seng mbouj ndaej gvai ,
Lumj haexvaiz deng raemx ;
Nanz beij mwngz nuengzx gyaemq ,
Bwnsaemq doengh saizsaiz .

Aen naj gou caenh nyaeuq ,
Lumj go'gyaeuq sam bi ;
Nuengx oiq vunz youh ndei ,
Nanz baenz sei lienz ngaeux .

Dangh ndaej nuengx mwngz eiq ,
Gwn lwgndeiq lij van ;
Seihnaeuz baenz caemh ranz ,
Sam ngoenz can hix nyienh .

Ndaej nem nuengx caemh ndwn ,
Lumj ronghndwen cibngux ;
Ndaej nem nuengx caemh youq ,
Guh hongbyouq hix gom .

Yiemhranz ndik dikdik ,
Mbwn nit hwnz youh raez ;
Ndaw sim yienznaeuz gyaez ,
Nanz bae laeng mwngz nuengx .

Dujva hai gwnzgo ,
Caen habhoz daegbeix ;
seiz daengz loenq roengz deih ,
Lij hoengzmaeq ndaw sim .

caezgya ndaem go'gyoij ,
Gangj coenz doiq ndaej sim ;
Vah bak cig cien gim ,
Caengz lau rin bienq namh .

Ndaej aeu nuengx guhyah ,
Gangj gvaq mbouj doxceng ;
Haemh ninz caemh fan denz ,
Vuen dengdeng daengz laux .

Aeu eij bae coh daiz ,
Lwnh va gai mwngz nuengx ;
Saed naemj sim mbouj cuengq ,
Muengh daeuj duengh beix gou .

Ndaej aeu mwngz guhyah ,
Raemxswiqnaj hix gwn ,
Ndaeuj caeuq nuengx baenzvunz ,
Lumj daj mbwn roengzdaeuj .

Cib it diemj gvaq buenq ,
Raeuz deng cuenq raeuqninz ;
Seizneix mbwn hix hwnz ,
Seiqlengq vunz cungj cingx .

Haemh ninz mbonq mbouj ndaek ,
Cuenq baek youh gvaq sae ;
Mij rox vih diuz lawz ,
Sim caenh gyaez mwngz nuengx .

Gou yeak gawx fwen mboengq ndeu .